Дорнод аймгийн Эрүүл мэндийн магадлалын зөвлөл 46 иргэний хөдөлмөрийн чадвар алдалтын хувь, хугацааг тогтоох асуудал хэлэлцлээ.

Дорнод аймгийн Нийгмийн Даатгалын Газрын дэргэдэх Эрүүл мэндийн магадлалын зөвлөл 7 хоног бүрийн пүрэв гарагт хуралдаж байна. 2025 оны 4-р сарын 24-ний өдрийн ээлжит хуралдаанаар 35 иргэний хөдөлмөрийн чадвар алдалтын хувь хугацааг сунгаж, 6 иргэнд шинээр тогтоож, 5 иргэний хувь, хугацааг цуцаллаа.

2024 оны 01-р сарын 01-нээс шинэчлэгдэн хэрэгжиж буй “Эрүүл мэндийн магадлалын зөвлөлийн дүрэм”-д “Хөдөлмөрийн чадвар алдалтын хугацаа сунгах тухай хүсэлтийг уг хугацаа дуусахаас 14 хоногийн өмнө, эсхүл хугацаа дууссанаас хойш 14 хоногийн дотор гаргана” гэж заасан.

Гэвч иргэд дээрх хугацаанд багтааж, хүсэлт гаргаагүйн улмаас сунгалт нь тасарч, авах ёстой тэтгэвэр, тэтгэмжээ бүрэн авч чадахгүй болох эрсдэл цөөнгүй гарч байна.

Иймд хөдөлмөрийн чадвар алдалтын хувь, хугацаа тогтоолгосон иргэд та бүхэн сунгуулах хүсэлтээ хугацаанд нь багтаан гаргахыг зөвлөж байна.